Braand.
In de nacht van zundag op moandag 7 november is der braand in n traainwagon bij Farmsun. Der ontstait braand bie t overbrengen van natrium. As der bie natrium vocht komt vlogt d boudel spontoan in de braand. n Braand is niks gain biezunders, der is wel voaker aargens braand. Mor n gewoon vuurtje is natuurlijk nait genog om op televiezie te kommen. Doar mot verslaggever dus wat aans van mokken. Bie TV Noord komt n man van de brandweer uutleggen wat der gebeurd is. In de buurt van de brannende wagon stait nog ain wagon vol met natrium. As dai der ook es bie in braand vlogen was, vrag verslaggever. Nou, zegt brandweerman, dai wagon ston op n vailige ofstand en boetendat ston de wind ook nog es aandere kaande op. Jò, mor as de wind es aans zeten har en wagon dichterbie stoan har, hou was t dan ofloopm, vrag verslageven verder. Ja, dan was t huil aans loopm, zegt brandweerman, dan hast ain vuurzee had van jewelster. Mor wind zat gelukkig in ain gunstige houke. Verslaggever is der nog nait kloar mit. Wat as de wind nou es aans stoan har, richting Delfziel. Nou begunt brandweerman ook te glunderen; hij krigt der ook oarighaid aan. Jò, zegt brandweerman, dan was t veur Delfziel nait goud ofloopm. Delfziel had dan misschien huilmoal nait meer bestoan. En zo fantaseren baaiden nog eevm deur over wat der wel ol nait gebeurt wezen kon as… As ik verslaggever zo heur is Delfziel op n hoar noa aan n complede verwoesting ontkommen. Zo’n verslaggever mag blievm, dai wait wat televisie mokken is. Zo kin je nog wel eevm deur goan. Want stel joe es veur dat der net ain traain langes reden was met honderd wagons vol natrium op weg noar Grunnen, en aain van dai wagons vat vlam, en machinist het niks deur en hai ridt zo Grunnen in! Huile stad Grunnen was der nait meer west. As
…. In de Biebel kom je of en tou ook zo’n ‘as’ opmaarking tegen. ‘As je dörst hebben …, en as je in Mie geleuvm’, zegt de Here Jezus, ‘uut joen binnenste zellen stromen van leevmd wotter kommen’. In t volgende vers stukt Johannes nog eevm uut wat Jezus met dai opmaarking bedoelt. t Gait over de Geest, zegt hij. Nou, en as je lezen wat der wel ol nait gebeuren kin, as dai vat op joe krigt! Ik wens joe olmoal ain gezegend en vurig neijoar.
EH
